តូក្យូ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានអញ្ជើញត្រឡប់មកកាន់ប្រទេសកម្ពុជាវិញហើយ បន្ទាប់ពីបញ្ចប់បេសកកម្មដែលមានចម្ងាយរាប់ម៉ឺនគីឡូម៉ែត្ររួចមក។
សម្តេចតេជោ ហ៊ុន សែន អញ្ជើញចាកចេញពីព្រលានយន្តហោះពីទីក្រុងតូក្យូ វិលត្រឡប់ទៅកាន់ប្រទេសកម្ពុជាវិញនៅម៉ោង ១០ព្រឹក (ម៉ោងនៅជប៉ុន) ថ្ងៃទី២៨ កញ្ញា នេះ។
ប្រសិនបើមិនមានការរំខានដល់ការហោះហើរទេនោះ យន្តហោះនឹងទៅដល់ព្រលានអន្តរជាតិភ្នំពេញនៅម៉ោង ២:៣០នាទីរសៀលនេះ។
សម្ដេចបានធ្វើដំណើរទៅកាន់សហរដ្ឋអាមេរិកនៅថ្ងៃទី២១ ខែកញ្ញា ដើម្បីចូលរួមមហាសន្និបាតអង្គការសហប្រជាតិ និងបន្តទៅប្រទេសគុយបានៅថ្ងៃទី២៤ ខែកញ្ញា ដើម្បីធ្វើទស្សនកិច្ចផ្លូវរដ្ឋ រួចក៏ទៅប្រទេសជប៉ុននៅថ្ងៃទី២៦ ខែកញ្ញា ដើម្បីចូលរួមពិធីបុណ្យសពអតីតនាយករដ្ឋមន្ត្រីជប៉ុន លោក ស៊ិនហ្សូ អាបេ។ បើគិតជាចំងាយមិនតិចជាង២ម៉ឺនគីឡូម៉ែត្រនោះទេ៕
